01. Танзани руу виз хэрэгтэй юу?

Тийм. Монгол Улсын иргэд Танзани руу зорчихдоо виз авна. Визийг урьдчилан онлайнаар мэдүүлэх эсвэл Танзанид ирээд нисэх буудал дээр Visa on Arrival хэлбэрээр авах боломжтой.

Миний хувьд нисэх буудал дээр визээ авч байсан бөгөөд үйл явц энгийн байсан.Visa 50$ гэдэг бөгөөд хөтөлбөрт үнэ нь багтаагүй болно.

02. Танзани руу аялахад вакцин заавал хийлгэх үү?

Бүх аялагч заавал тусгай вакцин хийлгэсэн байх шаардлагагүй. Харин Yellow Fever-ийн эрсдэлтэй улсаар дамжин Танзани руу нэвтэрч байгаа тохиолдолд вакцины гэрчилгээ шаардагдаж болох тул нислэгийн маршрутаас хамаарч тухайн үеийн шаардлагыг шалгах хэрэгтэй.

Вакцин хийлгэх эсэх нь аялагчийн сонголт, эрүүл мэндийн байдал болон аяллын маршрутаас хамаарна.

03. Килиманжарод авирах нь аюулгүй юу?

Килиманжаро бол 5,895 метрийн өндөр уул учраас эрсдэлгүй аялал гэж хэлэхгүй. Гэхдээ зөв хэмнэлээр авирах, өндөрт дасан зохицох, биеийн байдлаа тогтмол хянах, мэргэжлийн хөтөчтэй явах нь эрсдэлийг бууруулах хамгийн чухал зүйлс.

Авиралтын үеэр хөтөч нар аялагчдын биеийн байдлыг тогтмол хянаж, орой бүр цусны даралт болон цусан дахь хүчилтөрөгчийн хэмжээг шалгана. Аяллын багт эмнэлгийн анхан шатны хэрэгсэл болон нэмэлт хүчилтөрөгч байдаг.

Хэрэв биеийн байдал цааш авирахад тохиромжгүй бол оргилд хүрэхээс илүү аюулгүй буулгахыг нэгдүгээрт тавина.

Килиманжарод аюулгүй авирах хамгийн чухал дүрэм бол уултай уралдахгүй, биеэ сонсож, “pole pole” буюу яаралгүй, өөрийн хэмнэлээр урагшлах юм.

04. Килиманжарод авирахад уулын туршлага хэрэгтэй юу?

Техникийн уулын авиралтын туршлага заавал шаарддаггүй. Гэхдээ Килиманжаро 5,895 метрийн өндөртэй тул олон өдөр дараалан алхах тэсвэр, өндөрт дасан зохицох чадвар хамгийн чухал.

Манай 6 өдрийн маршрут өндөрт дасан зохицох нэмэлт өдөртэй бөгөөд яаралгүй, өөрийн хэмнэлээр өгсөхөд зориулагдсан.

05. Өндрийн өвчин гэж юу вэ?

Өндөрт гарах тусам агаар сийрэгжиж, бие шинэ орчиндоо дасан зохицох шаардлагатай болдог. Толгой өвдөх, дотор муухайрах, ядрах зэрэг шинж тэмдэг илэрч болно. Ямар нэгэн өөрчлөлт мэдрэгдвэл хөтөчдөө шууд хэлэх нь чухал.

Авиралтын үеэр орой бүр хөтөч цусны даралт болон цусан дахь хүчилтөрөгчийн хэмжээг шалгаж, биеийн байдлыг хянадаг.

Мөн 6 өдрийн маршрутын нэг өдрийг өндөрт дасан зохицоход зориулж, Horombo Hut-аас илүү өндөрт алхсаны дараа буцаж ижил өндөрт хонодог.

06. Биеийн бэлтгэлээ хэрхэн хийх вэ?

Техникийн авиралтын бэлтгэлээс илүү олон өдөр дараалан удаан хугацаагаар алхах тэсвэр чухал.

Аяллаас хэдэн сарын өмнөөс тогтмол алхах, өгсүүр зам болон шатаар алхах, cardio болон хөлний хүчний дасгал хийж бэлтгэхийг зөвлөж байна.

07. Ямар хувцас, хэрэглэл авч явах вэ?

Килиманжарод халуун орны ойгоос өндөр уулын хүйтэн орчин хүртэл өөр өөр нөхцөлөөр алхдаг тул зөв хувцас, хэрэглэлтэй байх нь маш чухал.

Өөрт байхгүй зарим уулын хэрэгслийг Танзанид очоод түрээслэх боломжтой. Хувийн уулын хэрэгслийн түрээс аяллын үнэд багтаагүй.

Sleeping bag зэрэг ямар хэрэгслийг өөрөө авч явах, алийг нь газар дээр нь түрээслэх боломжтой талаар аяллын өмнө дэлгэрэнгүй мэдээлэл өгнө.

Яг юу авч явах талаар дэлгэрэнгүй жагсаалтыг эндээс үзээрэй.

ХУВЦАС, ХЭРЭГСЛИЙН ЖАГСААЛТ →

08. Ачаагаа өөрөө үүрэх үү?

Үндсэн ачааг porter буюу ачаа зөөгчид авч явна. Аялагч өөрөө тухайн өдөр хэрэглэх ус, нэмэлт хувцас, нарны тос, хөнгөн зууш зэрэг зүйлсээ жижиг үүргэвчиндээ авч явна.

Porter-ийн авч явах ачааны дээд хэмжээ 20 кг.

09. Уулан дээр хаана, ямар нөхцөлд хоноглох вэ?

Marangu Route-ийн онцлог нь майханд бус уулын hut-д хонодог. Mandara Hut, Horombo Hut, Kibo Hut-д байрлах бөгөөд дотроо энгийн давхар ортой.

Та зөвхөн өөрийн групптэй бус, тухайн маршрутаар аялж буй дэлхийн олон орны уулчидтай нэг байранд хамт хоноглоно. Харин хөтөч, porter болон уулын багийнхан тусдаа байрлана.

Тансаг орчин биш ч дэлхийн өнцөг булан бүрээс нэг зорилготой ирсэн хүмүүстэй нэг дээвэр дор хонож, уулын амьдралыг хамтдаа мэдрэх нь Marangu Route-ийн өөрийн гэсэн онцгой туршлагын нэг хэсэг юм.

10. Уулан дээр ямар хоол идэх вэ?

Хоолны хувьд санаа зовох зүйлгүй. Хангалттай, өдөр бүр шинээр бэлтгэсэн хоолтой.

Өглөө hut-ийн нийтийн хоолны хэсэгт өглөөний цайгаа ууна. Өндөг, овьёос, талх, жимс зэргээс гадна цай, кофе байдаг. Тухайн өдрийн уух усыг өөрийн усны саванд дүүргэж өгөөд алхалтаа эхлүүлнэ.

Өдрийн хоолыг замдаа идэхээр савлаж өгнө. Шарсан тахианы гуя, жимсний шүүс, жигнэмэг, жимс зэрэг авч явахад тохиромжтой хоол байна.

Дараагийн hut-д хүрэхэд тогооч нар түрүүлж очсон байдаг тул халуун цай, хөнгөн зуушаар угтана. Амарч дулаацсаны дараа оройн хоолонд шөл, үндсэн хоол, жимс зэргээр үйлчилнэ.

Ууланд олон цаг алхдаг болохоор хоол багадах вий гэж санаа зовох хэрэггүй — хоолны хэмжээ хангалттай. Авиралтын үеийн хоол болон ундны ус аяллын багцад багтсан.

11. Ариун цэврийн өрөө, шүршүүр байдаг уу?

Hut-ууд ариун цэврийн өрөө болон гар, нүүрээ угаах устай. Нөхцөл нь энгийн боловч цэвэрхэн. Харин халуун усны шүршүүр байдаггүй.

Өглөө, орой бүр тусгайлан халаасан бүлээн ус өгдөг тул гар, нүүрээ угааж, хувийн ариун цэврээ сахих боломжтой.

12. Утасны сүлжээ, интернет байдаг уу?

Танзанид очоод хөтөчдөө хэлж дотоодын SIM карт авах боломжтой. Утас тань physical SIM ашиглах боломжтой бол тохирох дата багц авахад хөтөч тусална.

Marangu Route-ийн hut-уудын орчимд үүрэн холбооны сүлжээ ордог. Гэхдээ уулын нөхцөлөөс шалтгаалан хурд, тогтвортой байдал харилцан адилгүй байж болно.

13. Аяллын даатгал хэрэгтэй юу?

Тийм. Аяллын даатгалаа Монголд байхдаа хийлгээд явахыг зөвлөж байна.

Даатгал сонгохдоо өндөр уулын авиралт, яаралтай тусламж болон шаардлагатай тохиолдолд нүүлгэн шилжүүлэлтийг хамарч байгаа эсэхийг шалгаарай.

Аяллын даатгал аяллын үнэд багтаагүй.

14. Килиманжарод авирахад хамгийн тохиромжтой үе хэзээ вэ?

Килиманжарод жилийн турш авирах боломжтой ч улирал бүрийн цаг агаар, үзэгдэх орчин, аялагчдын тоо өөр байдаг.

Мөн сафари эсвэл Занзибартай хослуулан аялах бол аяллын зорилгоос шалтгаалан хамгийн тохиромжтой сарууд өөрчлөгдөнө.

ТАНЗАНИД ХЭЗЭЭ АЯЛАХ ВЭ? →

15. Оргилд хүрч чадахгүй бол яах вэ?

Оргилд хүрэх нь бидний зорилго хэдий ч аюулгүй буцаж ирэх нь үргэлж нэгдүгээрт. Биеийн байдал болон өндөршлийн шинж тэмдгээс шалтгаалан хөтөч цааш авирахгүй байх шийдвэр гаргаж болно.

Килиманжарогийн оргил бол аяллын хамгийн өндөр цэг болохоос таны аялал амжилттай болсон эсэхийг хэмжих цорын ганц зүйл биш.

16. Авиралтын үеэр бие муудвал яах вэ?

Авиралтын турш хөтөч нар аялагчдын биеийн байдлыг хянадаг. Аяллын багт эмнэлгийн анхан шатны хэрэгсэл болон нэмэлт хүчилтөрөгч байдаг.

Хэрэв цааш авирах нь тохиромжгүй гэж үзвэл аялагчийг нам өндөр рүү аюулгүй буулгах арга хэмжээг газар дээр нь зохион байгуулна. Шаардлагатай тохиолдолд уулын зориулалтын дамнуургаар буулгах боломжтой.

Миний хувьд оргилоос буух үед бие муудахад хоёр хөтөч Kibo Hut хүртэл түшиж буулган, тэндээс уулын дамнуургаар нам өндөрт хүргэсэн. Доошлох тусам биеийн байдал мэдэгдэхүйц сайжирч байсан нь миний өөрийн туулсан туршлага.

17. Хөтөч, porter нарт гарын мөнгө өгөх үү?

Танзанийн аялалд хөтөч, porter болон аяллын багийнханд гарын мөнгө өгөх нь түгээмэл бөгөөд аяллын үнэд багтдаггүй.

Хэмжээ нь группийн хүний тоо, аяллын хугацаа, авсан үйлчилгээнээс шалтгаална. Миний хувьд Килиманжарогийн авиралтын төгсгөлд уулын хөтөч, porter-ууддаа нийлүүлээд ойролцоогоор $100, сафари аяллын төгсгөлд үндсэн хөтөчдөө $50 орчим өгч байсан.

Энэ нь тогтсон тариф биш. Гарын мөнгө бол аяллын турш хамт байсан багтаа талархлаа илэрхийлэх нэг хэлбэр юм.

18. Танзанид бэлэн мөнгө авч явах хэрэгтэй юу?

Ам.доллар бэлнээр авч яваад, очсоныхоо дараа хэрэгцээнийхээ хэмжээгээр албан ёсны валют солих газарт Танзанийн шиллингээр солиулах нь тохиромжтой.

Зарим үйлчилгээний газар картаар төлбөр хийхэд нэмэлт шимтгэл тооцдог бөгөөд ATM-аас бэлэн мөнгө авахад ч шимтгэл өндөр байж болно. Харин томоохон дэлгүүр, брэндийн дэлгүүр болон зарим сувенирын дэлгүүрт картаар төлөх боломжтой.

Аяллын үндсэн төлбөрүүд урьдчилан зохицуулагдсан байдаг тул их хэмжээний бэлэн мөнгө авч явах шаардлагагүй.

19. Килиманжарогийн дараа аяллаа үргэлжлүүлж болох уу?

Болно. Килиманжарогоос буусны дараа Arusha-аас сафари, Занзибар болон Танзанийн бусад аялалтай холбон үргэлжлүүлэх боломжтой. Нэмэлт аялал үргэлжлүүлэн авах нь мөнгөнд ч хэмнэлттэй.

ДАРААГИЙН АДАЛ ЯВДЛАА СОНГОХ →

20. Зөвхөн өөртөө зориулсан аялал зохиолгож болох уу?

Болно. Хүн бүрийн аялах хэв маяг өөр учраас аялал ч заавал нэг загвартай байх албагүй.

Та илүү тав тухтай аяллыг хүсвэл тансаг зэрэглэлийн буудал, хувийн сафари, агаарын бөмбөлгийн нислэгтэй аялал зохиож болно. Харин Африкийг илүү ойроос мэдрэхийг хүсвэл нутгийн хүмүүстэй хамт амьдарч, загасчилж, өөр ууланд авирч эсвэл бүр майхантай адал явдалт аялал ч зохиож болно.

Та хаашаа явахыг хүсэж байгаагаас гадна, тэр газрыг хэрхэн мэдрэхийг хүсэж байгаагаа надад хэлээрэй. Би түүнд тань тохирсон аяллыг бүтээж өгнө.